|
|
O Concello de Ferrol comezará no mes de outubro un obradoiro de emprego dual no sector forestal denominado "Costa Verde".
Martes, 25 de setembro de 2018
A Xunta de Galicia concedeu unha subvención para este obradoiro destinado a un total de 20 alumnos/as traballadores/as, con unha duración prevista de nove meses.
O obradoiro de emprego dual "Costa Verde" esta destinado á conservación e mellora de parcelas verdes municipais, a través de dous equipos de dez alumnos/as traballadores/as, e un equipo técnico formado por cinco persoas.
As persoas beneficiarias como alumnado/traballador recibirán unha formación do certificado de profesionalidade "actividades auxiliares en conservación e mellora de montes" que de ser superada daralles acceso a este certificado de nivel 1. Xunto con este certificado recibirán diversa formación complementaria como prevención de riscos laborais, sensibilización ambiental, manipulador-aplicador de produtos fitosanitarios, alfabetización informática, igualdade de xénero e inserción laboral, entre outras.
As parcelas nas que se ten previsto actuar, atópanse en tres zonas do termo municipal de Ferrol: a zona do Cuartelillo do Grupo Táctico de Prior, o Bosque Monumento a Torrente Ballester, e a zona da Aguillón (Serantes). E nas mesmas realizaranse diversos traballos de roza de mato e herbáceas, apeo e poda de árbores, revisión do estado fitosanitario das árbores, e repoboacións.
As persoas interesadas en formar parte deste obradoiro de emprego dual, terán que dirixirse á oficina de emprego do Servizo de Emprego Público de Galicia.
Máis información 981944195
|
|